Warning: Undefined array key "status" in /srv/users/str-t/apps/str-t/public/wp-content/plugins/cookie-notice/cookie-notice.php on line 293

Warning: Undefined array key "subscription" in /srv/users/str-t/apps/str-t/public/wp-content/plugins/cookie-notice/cookie-notice.php on line 296
Rajaton kesäleiri Suaninkissa – STR-T

Rajaton kesäleiri Suaninkissa


Nils Palovaara. Kuva: Privaatti

Jo 1991 järjestethiin ensimäinen leiri Suaninkissa Korpilombolon ulkopuolela ihmisille joila oon toimintavaihtelua. Tulisielu Nils Palovaara pani alkhuun ja oli siihen aikhaan töissä kylän koulula.

-Meilä oli ensin leiri syksylä mutta sillon oli niin paljon mäkärää ja muuta hankaluutta ette se siirethiin kesäksi. Mie satsasin 1000 kr omasta pörsistä ja kyläläiset järjestit ruokaa ja makauksia.

Koulu Svangården Suaninkissa. Kuva: Privaatti

Koulu ”Svangården” panthiin alas jo 1969. Kyläläiset sait aijanolhoon ostaa koulun kruunula ja otit hoijon ja ylläpion halthuun. Rakenuksessa oli pitkhään väävitupa, jota Nilsi autto hoitaa. Justhiin ko leiri tuli käynthiin niin koulu oli korjattu valhmiiksi.

-Ensi alusta tuli vain kaks henkilöä, sitten oon tullu enämpi ja enämpi. Meilä oon monta jokka tuleva takasi joka kesä.

Enniin leirissä oon ollu 50 henkeä. Vanhiin oon samanikänen ko Nilsi itte, 78 vuotta – toiset oon kahestakymmenestä päälepäin ja net tuleva Suomen ja Ruottin Tornionlaaksosta, Muoniosta, Kolarista, Pajalasta, Mataringistä ja Ylikaihnuusta. Leirissä puhuthaan meänkieltä ja suomea ja tietysti ruottia niile jokka ei ymmärä niitä toisia kieliä.

-Meilä oon paljon aktiviteettiä. Koulu oon lähelä fiiniä järveä, Suaninkijärveä, missä oon pitkä ranta ja pontooni mitä met saatama käyttää. Met käymä uimassa ja olema järvelä. Joka kesä met tehemä reisun, met olema esimerkiksi käyhnee Haaparannala ja Jokissa. Ja sitte meilä oon aina viihtettä, meän osanottajat tykkäävä mysikistä ja tansista.

Leirilä oon kans yhtheistyötä Pajalan parasportin kans, joka järjestää sporttiaktiviteettiä joka vuosi.
Niin osanottajat ko heän omhaiset oottava leiriä ko paljon aktiviteettiä ihmisille joila oon toimintavaihtelua ottava pitkän kesäluan.

-Omhaiset oon hyvin kiitoliset leiristä. Moni osanottajista oon olhee kotona paljon vuen aikana ja nyt omhaiset saava helpotusta ja vähän semestiä.

Leiri alkaa aina 13 heinäkuuta ja jatkaa 10 päivää. Kyläläisiä ja eläkeläisiä jokka tuleva muualta auttava laittaa ruokaa, järjestää aktiviteettiä ja olla vyövahtina. Kylä ellää leirin aikana, sannoo Nils joka itte oon syntysin kylästä, mutta ei ennää asu kylässä. Nuoret oon siirtynhee kylästä missä nyt oon suunile 20 asukasta, mutta meänkieli ja tornionlaaksolainen kylttyyri oon vielä luja paikkakunnala.

Tulavanna vuona leirilä oon 30-vuotisjuhla ja Nilsilä ja toisila vapaehtosilla oon isoja suunitelmia.

-Mie jatkan niin kauon ko jaksan. Tulevanna vuona met meinaama kuttua prinsessan Victorian ja Danielin. Met lähätämmä kuttun niile nyt jo, 20-vuotisjuhlaan met olima liika hiljain kuttun kans.

Karin Skoglund
Käännös: Linnéa, Märta & Karin Nylund