Stefan Lampinen, jolla oon juuret Tornionlaaksossa oon lekenti ruottalaisela pelialala. Kuva: Mats Lundgren
Tornionlaaksolaisjälkeläinen Stefan Lampinen oon yks Ruottin peliintystriin perustajista. Lekenti joka oon ollu keksimässä tunnettuja tavaramerkkiä, Fifa, Xbox ja Harry Potter.
-Yks etu ko tullee Luulajasta ja oon ollu paljon Tornionlaaksossa oon ette sulla oon molemat jalat maassa. Mulla ei ole yliopistokoulutustakhaan, mie olen ottanu sen pitkän tien, sannoo Stefan joka johtaa konsylttifirmaa Game Advisor.
Tänäpäivänä 57-vuotias Stefan käyttää kaiken hänen kokemuksen auttamisheen johtaa puulaakia peliintystriissä. Hään tukkee start-appi-perustajia jokka tartteva neuoa saahmaan vauhtia toiminthaan, ja antaa kans neuoa isomille puulaakile.
-Mie olen vähän niinku tohturi jolle net saattava soittaa ja saa tipsiä.
Alama alusta – ja sillon met tulema Luulajhaan, Hertsöhniin alkupäivinä 1980-lukua. Stefan oon 21 vuotta ja oon vasta alkanu myyhmään rollipeliä vanhimitten karasissa. Näihin aikhoin se ostaa lautapeliä koko mailmasta hänen liikheen, Speltjänstin kautta.
-Siittä tuli syksee, ihmisiä tuli kaukaa, Rovaniemeltä, Ylitorniosta… Net tulit tiiselimersoila ja ostit aika paljon.
1986 tuli siirto Stockholhmiin missä se sai rakentaa pelipuoin Östermalmissa, missä oli muun muassa sälskaappipeliä, erikoisia sakkipeliä, pakkammonia, mailman parhaita pelikorttia Las Vegaksesta. Niin neuon se sai tehtävän olla vastuussa puoiketjun Traditionin rakentamisessa. Tämän kaiken ennenko taattapelit tulit markkinoile.
Se oli Stefan joka toi Trivial Pursuitin Ruothiin 1986 ennen Brion isoa lanseerausta.
-Pieni peli jonka nimi oli Heitä sikkaa tuli kans suuri syksee Ruottissa. Sen met keksimä pypissä Lontonissa.
Mats Sundin ja Stefan Lampinen pellaava hokkypeliä Sega Mega Drivessa 1993 BRIOSSA. Kuva: BRIO Playmix
Stefan oli monta vuotta töissä konsylttinä Briole ja toi Sega Mega Driven Ruothiin 1990. Jälkhiin myyntimenestyksen se sai tehtävän panna käynthiin Electronic Artin pohjoismaisen kontturin.
Tänäpäivänä se saattaa lisätä menestyksiä hänen cv.hen: Nokia, Warner Bros, Microsoft, Minecraft…. Se oon ollu myötä Ruottin pelihistuurian isoissa menestyksissä, esimerkiksi ko lanseerathiin Microsoftin Xbox 360 Euroopassa, mikä katothaan olevan läpilyönin TV-pelialala.
1999 tuli sirto Londonhiin vaimon ja heän kahen pikku tyttären kans. Nyt pere oon takasi Ruottissa. Pari assuu millon Nackassa, Stockholmissa ja millon Londonissa (ko oon maholista pantemiin takia).
Stefanilla oon iso suku Tornionlaaksossa molempain, mamma Estridin ja pappa Arnen, puolelta.
-Mie olin paljon fammun Bedan ja faffa Kallen tykönä Juoksenkissa kläppinä. Joku vuosi sitten se tuntu tärkeältä aijaa kylitten läpi kläppiin kans ja näyttää kauppoja ja paikkoja missä mie olen ollu… Pajala, Kaartinen, Köngänen, Jarhoinen, Näistenkangas: Joka paikassa oli ennen aikhaan joku musteri eli murpruuri, jonka tykönä saatto käyä kylässä. Koko välin Hietaniehmeen.
Setät Per, Harry, Lars ja täti Mariann miehensä Jan-Erikin kans, oon olhee hyvät palloplankut Stefanille hänen ensimäisten pisnis-vuositten aikana.
Stefan ja nepokka Mikael Juntti Neistenkankhaasta leikittelit paljon yhessä kläppinä. Kuva: Privaatti
Mitäs lautapeliä sie pelasit kläppinä?
-Monopolia jonka mie ja Thomasveli rakensimma uuesti ja tehimä vähän paremaksi. Finansia ja Riskiä met kans pelasimma. Se oli toela Thomas ja minun lapsuuenkaveri Erkki jokka keksit ajatuksen ette minun sopis tehä peliä.
Stefania oon haettu vasitusti monta kertaa mutta hään oon pysyny pelialala.
Mikkäs oon sinun favuriittipelit tänäpäivänä?
-Games of Thrones (yks variantti Riskistä) ja sitte junapeli Ticket to ride. Valitettavasti työ oon vieny paljon aikaa ja mie olen pannu perheen ja kaverit etusiale ko mie en ole ollu töissä. Mie olen kans vaimoträänari jalkapallossa täälä Stockholmissa ja olin kans Londonissa. Mie olen ennen laukkonu ulos jalkapalloplaanale ko pelanu peliä.
Stefan oli nuorena hyvä forvarti Notvikenissä ja Gammelstadissa jokka siihen aikhaan olit ensimäisessä tivisuunissa.
-Mulla oon kans SM – hopea Luulajan Hokyn Pojat A:n kans, mutta mie heitin ko mie olin 16. Ison osan minun enkkeltistä johtajamallista mie olen saanu minun träänarilta Luulajassa ja joiltaki vanhiimilta pellaajilta joista moni oli Tornionlaaksosta.
Stefan sannoo ette hään uskoo jeehniin Luulajasta ja Tornionlaaksosta:
-Sitä tekkee töitä, lujasti ja pyssyy alhaisenna. Mie tykkään kans suomalaisesta menttaliteetistä. Ruottissa oon ollu enämpi iisiraitia ko suomen kylttyyrissä, joka oon saanu taistela. Mie tykkään ette met saisima kattoa suomalaista kauppakylttyyriä ja oppia siittä.
Fammu Beda Lampinen ja täti Mariann Juoksinkissa oon merkinhee paljon Stefanille. Kuva:Privaatti
Pelialan tulevaisuus?
-Villi kasvanti. Puolentoista vuen aikana käyttäjämäärä oon kasunu 150 miljoonala! Ruottissa peli-intystrii pyörittää yli 25 miljaartia. Peli-intystrii oon isompi ko lastipiilinmyynti mailmassa ja valtavat summat oon käynissä.
Luppaavat pelinkehittäjät saattava olla missä hyänsä mailmassa.
-Kattoppa pientä peruskoulua Tornionlaaksossa! Joka koulussa oon vähhinthääns yks oppilas joka tietää vaikka kunka paljon hänen smaartföunista, sielä saattaa tapahtua kiinostavia asioita. Opettajanna ja vanhimpanna häätyy olla herheilä sen vuoksi ette talangia tullee joka kantilta. Sillä tavala se oon helpompi mennä etheenpäin tällämailmanaikana.
Oonkos sulla neuoa antaa nuorile jokka oon lähtemässä työelähmään?
-Ette aatela poksin ulkopuolele. Etu meän tikitaalisessa mailmassa oon ette maholisuuet löytyvä pienissä kylissäki. Sitä ei tartte olla kytketty issoon kaupunkhiin ette saa menestystä. Issoin haaste pienemissä paikoissa oon ette saa rahan, ette löytää rahottajia. Mutta siinäki saattaa löytyä apua paikkakunnalisesti ja rekionaalisesti. Minun neuo nuorile oon: ”Usko sinun hunteerinkhiin ja yritä! Freistaa löytää jonku joka saattaa auttaa. Sulla ei ole pienempi maholisuus onnistua jos sulla oon hyä kauppaitee Pajalassa ko Jönköpingissä.
Meänkielentänny: Märta, Karin ja Linnea Nylund
Fuutnuutti: Stefan Lampinen selittää elämästänsä potissa https://podtail.se/podcast/spelskaparna/110-stefan-lampinen-sega-ea-microsoft/
