Cindy Stenberg oon filmintekiä Kierunasta joka tekkee karriääriä pöläkefilmityylissä. Valokuva: Privaatti
Cindy Stenbergin pöläkefilmit levittävä pölköä kauas Ruottin rajoitten ulkopuolele. Seuraava tuotanto oon monsterifilmi joka pelathaan sisäle hänen pesotuassa.
-Kaikki maanykset mikkä mie olen kirjottannu tähän asti oon semmosia mikkä oon mulla olhee painajaiset. Mie toivon ette muut jakava minun pölön olemattomille kokemuksile, sannoo filmintekiä Kierunasta.
Cindy oon syntyny ja kasunu ylös Kierunassa ja oon aina ollu filmihullu. Pienenä hään hyyräsi VHS – filmiä papan kans (kaks yhen hinnala), ja ko näytethiin pöläkefilmiä teeveessä niin hään oli aivan villissä. Ensimäinen pöläkefilmi jonka hään muistaa oon ” Anaconda” ja hään oli seittemän.
-Mie hiivin trappuja alle ja katton salassa.
Täytenä hään oli myötä SVT:n isofilmiprujektissa ” Solstorm” ja ” Midnattssol” jokka pelathiin sisäle Kierunan alueela, Cindylä oli statistirollia ja teki stynttiä, ja kirjotti filmimaanyksiä samala. Mutta hään tunsi ette hänen luovuus ei saanu oikeen tillaa Kierunassa ja kolme vuotta aikaa hään muutti Uumajhaan. Muutto tuli samala aikaa ko kursi maanyskirjottamisessa. Sillon kaikki löysäsi oorninkhiin.
Siittä ko hään keksi pöläke-apin kaverin kans, hään sai yhtheyttä Skelleftelaisen Swedish Ghost Lovers ryhmän kans, norrlantilaisia jokka tekevä tokymentääriä ja lyhyfilmiä pölön hengessä.
Atrophy oon Cindyn ensimäinen ja enniin huomioittu filmi. Katto sen youtubissa!
Siihen aikhaan hään kirjotti maanystä siihen mikä tuli lyhyfilmi ”Atrophy”(Kuihtua) ja yhtheistyö Swedish Ghost Lovers ryhmän kans alotethiin.
”Atrophy”, joka oli Cindyn ensimäinen lyhyfilmi, oon lumonu filmimailman. Se oon saanu monta palkintoa, viimiseksi maaliskuussa 2021 ko se Lontonissa valithiin ”Paras ulkomaalainen filmi”.
Filmi selittää Frejasta joka alkaa uuen työn persoonalisenna asistenttinä Almale. Almala oon kummalisesti menny puhe ja se ei viivy kauon ennenko Freja tuntee ette jotaki ei ole oikeen talossa.
-Tämähään oon minun ensimäinen lyhyfilmi ja mie tunnen itteni villin iloselle ette ihmiset tykkäävä siittä.
Filmin pellaaminen oli iso prujekti, missä oli 15 – 20 henkeä myötä ja missä Cindy samala teki paljon itte.
-Eihään meilä ole rahhaa palkata ihmisiä. ”Atrophyssä” mie olin prujektinjohtaja, tehin kontrahit, toimitin näytteliöitä, järjestin vaatheita ja ohjasin. Vaikka mie tehin paljon niin en olis koskhaan pystyny siihen ilman minun fantastista filmiryhmää, meän myysikkerit, filmaajat ja monta muuta.
Cindy oon tyär joka antaa kaiken ja hään päätti ennen filmaamista nukkua yksin tyhjässä kämpässä Skråmträskissä, missä osat piethiin pelata sisäle.
-En mie ole koskhaan nukkunu yksin kämpässä ilman sähköä eli tualettiä. Aivan yksin mettässä Skråmträskissä oli hirveän pölättävää. Mie pölkäsin kohta ette kuolin.
Filmiryhmä löysi kämpän Blocketista.
-Kampheet mikkä olit talossa olit oikeen inhottavia ja sovit filhmiin niin mie otin hyvin vähän rekvisiittaa matkhaan.
Osa ryhmästä joka teki maholiseksi tuottaa pöläkheen Atrophy:iin täälä yksinhäisessä mökissä Skråmträskissä. Valokuva: Privaatti
Cindy oon kans lyhyfilmin “Dreamcatcher”:in takana (se selittää unipyytäjästä jolla oon pahoja ajatuksia) mikä kans oon palkittu. Ammattilaiset oon selvittänhee ette se oon hieno ja kaunis pöläkefilmi missä ohjaaja näyttää ette hään hallittee monta eri ilmaisukeinoja ja mallia.”
Minkäslaisesta pöläkheestä sie tykkäät parhaiten?
-Paranormaalista, yliluonolisesta, Mutta seuraava lyhyfilmi, minkä met tehemä nyt kesälä, oon monsterifilmi minun pesotuassa, sillon issoin osa rahasta mennee sminkhiin ja monsterintekhoon. Praktiset vaikutukset saava fuukkystä.
Sie lähet siittä mitä sie itte pölkäät ko sie kirjotat maanyksen?
-Joo, kaikki mitä mie olen kirjottannu tähän asti oon semmosta mistä mulla oon ollu painajaisia. Toivon ette muutki jakava sen pölön.
Mikäs oon niin viehettävää pölössä?
-Sitä oon pilvessä luonolisesti, ei tartte ottaa huuhmeita eli semmosta mikä oon huono kropale. Pölkö pakottaa sinut tuntheen tuntheita eri mallila ko mitä kometii eli traama tekkee. Joskus mie pölkään niin ko näen filmin ette halvaisin oksentaa, sillon oon villin hauska. Mikä rysy!
Atrophy käsittellee nuorta tyärtä, Almaa, joka kummala laila oon menettänny puhheensa. Valokuva: Privaatti
Sie tulet Kierunasta ja Tornionlaaksosta. Uskoks ette kattojat huomaava mistä sie olet lähtösin?
-Ei tähän asti mie uskosin, mutta mulla oon halu tehhä pöläkefilmin esimerkiksi ko oon jään päälä ja kalastaa arkissa. Vaikka se vaatis ryhmän ja laitheet jokka pärjäävä pakkasessa…?
-Minun perheelä oon kämppä Aavasaksala suomenpuolela, ja ei se ole mahoton ette met filmaama sielä jonaki päivänä, sielä oon pölättävä kaivo.
Mitäs sie uneksit tulevaisuuesta?
-Ette saa sanoa ylös itteni työstä IT- sypoortterinna ja koko syämestä tehhä filmituotetta. Nyt mulla oon kaks pitkääfilmiä käynissä ja monta lyhyfilmiä.
Cindy otethiin varemin tänä vuona Meän Äänen filmiprujekthiin nuorile filminluojile pohjosessa, esimerkiksi antamhaan tipsiä muile jokka halvava tehhä filmiä.
Yks filmiseeni säkkipimeässä missä oon savusia efektiä. Valokuva: Privaatti
Saataks sanoa joitaki tipsiä?
-Mene sisäle youtubhiin ja hae mitä sie halvat oppia. Mie googlaan esimerkiksi paljon kaameravinkkeliä, filmianalyysiä, maanyksiä… Katto kaikki youtubeklipit mitä sie saatat ja opi kaikki mitä sie saatat.
-Älä pölkää tehhä pois ittesti, tohi kokkeila uusia asioita. Mie pölkäsin ”Atrophyn” kans, mie en ollu koskhaan johtanu ryhmää ennen, mutta se meni hyvin.
-Mene myötä filmiryhmiin Facebookissa. Sielä sie saat yhtheyttä muitten kans ja tehhä työta ryhmässa. Laaja kontaktiverkosto oon kullan arvonen.
Varustus?
-Niitä löytyy instansia jokka hyyräävä ulos kaameroita, esim. Filmi Västerbottenissa ja Filmpool Nord Luulajassa. Mutta kaamerat jokka oon mupiilissä oon oikeen hyvät. Moni oon pannu ulos pitkiä filmiä youtubissa mikkä oon filmattu ainuasthaan mupiilikaameralla.
Meänkielentänny Karin, Linnea ja Märta Nylund
Nootti: Cindy Instagrammissa:@cindystenberghorrorfilms
Katto Cindyn lyhyfilmiä tässä, esim. Atrophy: https://youtu.be/9zb6cTJtj7k
