Tornionlaaksolaisten päivänä, 15 juli Jellivaarassa, jaethiin STR-T:n jokavuotinen kulttuuripalkinto 10 000 kruunua Daniel Fjellborgile Ummikkopodin tuotanosta vuona 2021. Nuorukaisitten kulttuuripalkinnon jako Met Nuoret Ingrid Mellale hänen työstä ette, muun muuassa filmin kautta, saa nuoria tuntemhaan yhteiskuuluvuutta kulttuurin ja kielen kans.
Mutiveerinki Daniel
Daniel välittää meänkielestä ja nosta framile eri näkökulmia kielestä ja kulttuurista. Hään antaa peitetylle tuntheile maholisuuen tulla framile ja saapii osanottajat hunteeraamhaan heän relasuunia kielheen ja kulttuurhiin. Hään antaa meänkielen kulttuurile paikan missä se saapii siiaa ja missä se leviää. Hään nosta framile ihmisiä jokka tekevä aktiivisesti työtä ette tornionlaaksolaisten, lantalaisten ja kväänitten kulttuuri tullee näkösälle, kuuluu, säilyy ja kehittyy.
Mutiveerinki Ingrid
Ingrid näyttää ette hään oon halukas jakkaa meänkieltä, ei vain niile jokka ossaavat kieltä ko kans niile jokka ei ossaa sitä. Hään oon jymnaasiassa jo kirjottanu näytelmän mikä oon esitetty meänkielelä ja tekkee nyt työtä ette tulla filmin tuottajaksi mikä saattaa syynätä minkälaista se oon olla tornionlaaksolainen. Hänen teon kautta, kielen puolesta, kans nuoret saattava näkeä ette kieli oon kaikitten, ei kieli mikä vanhempi sukupolvi käyttää, ja ette kieli oon elävä ja jostaki mistä pittää olla ylpeä.
Onnitteluita Danielile ja Ingridille liiton johtokunnasta ja kansliistä!
Kulttuuripalkinosta
Svenska tornedalingars riksförbund – Tornionlaaksolaiset jakkaa joka vuosi 10 000 kulttuuristipentiymmin, 10 000 kruunua, jollekki yksityisele eli föreninkile joka oon tehny hyvvää kielen ja/eli kulttuurin puolesta. Palkintoja oon kaks, raahvaisluokassa yks ja toinen nuorukaisluokassa. Meetlemmit ja muut saavat joka vuosi esittää kantitaattia. Sen jälkhiin johtokunta päättää kuka saapii vuoen stipentiymmin. Palkinto jaethaan tulevana vuona. Viimivuonan raahvaitten palkinnon jaethiin kahele, ”Signe” Inga-britt Uusitalole ja Henrik Nivale.
