Rappari ylistää Tornionlaaksoa Spottifai-listala


Kappale 953 HPDA oon syntyny rakhauesta Haaparannale ja rakhauesta ihmiselle. Sebastianin suunitelma oon ette tehhä kappaleita teemala Tornionlaakso. Valokua: Privatti.

Rappikappalheela joka ylistää rakhautta Haaparanthaan ja elähmään, Sebastian Westin-Viippola pääsi Spottifain ”Release Radarhiin”.

Mie halvan ette net jokka oon jäähnee sinne ylös saattava olla ylpeät Haaparannasta ja ette net ei missään nimessä häpeä heän taustaa, sannoo 25-vuotias.

953 HPDA oon syksyn aikana leviny netilä koko Ruottissa ja varhmaan rajojen ulkopuolelekki. Sebastian Westin-Viippola, syntyny ja kasunu ylös rajakaupunkissa, oon kappalheen takana. Poika oon meetiassa selittänny enniten hänen katkenheesta sölästä ja hänen lujasta halusta ottaa elämän taltheen. Nyt hään oon ottanu mysikaalisen jättiläisaskelheen.

Artistinimi oon TornedAlien ja mysikkiviiteossa 953 HPDA oon strooffia ruottiksi ja meänkielelä.

”Vart jag än far

Vet jag exakt vart jag har

Mitt DNA

HPDA 953, ja

Borta bra men hemma bäst

Var är nästa hemmafest

Med den finska kulturen …?”

Se oon Sebastianin ensimäinen oma kappale missä hään oon tehny kaikki alusta saakka.

Mysikaalinen ylistys hänen omile juurile ei ole kirjotettu semmoselta joka oon kasunu ylös jitarri käessä.

– Ei,ei, mie olen ollu niin epämysikaalinen ko sitä saattaa olla. Sitä saattaa harjottaa kykyä.

Sebastian alko pellaahmaan ko se oli kahenkymmenen!

Tekstiä sen siihaan hään oon aina kirjottannu ja se seuraa hänen yritystä ette ”tutkia mitä minun päästä löytyy, ette kytkeä ajatukset kokhoon.” 

Halvaa selittää elämän maholisuuksista

Nyt hään valmistautuu ette jälkhiin uuenvuen selittää nuorile kunka arvokasta se oon ette ottaa elämän taltheen. Hällä oon ittelä kokemusta kunka ankara elämä saattaa olla, mutta kans kunka tärkeä se oon ette arvottaa sen mitä sulla oon. Hään halvaa antaa toivetta nuorile ja näyttää ette paljon oon maholista vaikka oon vastakäymisiä. Hänen oma takaisku tuli hälle 2015.

Kahen kaverin kans hään aiko tutkia buddhismiä ja kohtasi Dalai Laman Indiassa. Pikkusta ennen vahinkoa Sebastian oli ollu hiljasuuessa kymmenen päivää ja metiteeranu.

– Met olima menossa yhele vesiputtouksele Himalayassa missä met meinasimma ripustaa meän hängmatot ja nukkua niissä vyön yli

Ko hään putosi net 7-8 meeteriä jyrkästä vaaranlaijasta ja makasi maassa, tietosanna ette hään oli vakavasti loukkaintunnu, hään tunsi kumman rauhan.

– Tähtitaivas oli niin kaunis, en ollu koskhaan ennen nähny semmosta. Ja mulle tuli semmonen suuri rauha, tunnelma ette ”kyllä se siittä järjestyy”.

Se tuli esile ette hään oli katkassu sölän ja oon tänäpäivänä aivan riippuvainen hänen rullatoolista. Mutta hään ei anna sen estää. Toisinpäin hään oon alkanu Youtubekanalin Loopwhoop missä hään selittä elämästä rullatoolissa, nauru silmässä. Ja ko tämä kirjotethaan hään oon Ameriikassa missä hään oon myötä MM:issä bobissa! 

Sebastian tykkää reisata, se oli reisussa ko hään katkasi sölän. Valokua: Privatti.

Turvalista olla tornionlaaksolainen

Sebastian assuu Boråsissa tyärystävän kans ja mysikki oon yks hänen tärkeimistä intohimoista. Sen hään luopii taatturin ääressä missä hään pannee ääniä/instrymänttiä ja nauhottaa oman jitarripelin. Nimen TornedAlien Sebastian oon ottanu suulu-artistinimeksi, mutta hään pellaa monessa muussaki ryhmässä, esimerkiksi Klotets tuffingar yhessä Jakob Göthagerin kans.

– Se olis ollu mukava jos mulla olis ollu rakhaus Haaparannale ja suomalaisele kylttyyrile jo pienenä. Nyt mie tykkään ette se oon tärkeä ette nuoret sielä ylhäälä tunteva ylpeyttä, ette niilä oon turva siinä ette oon tornionlaaksolainen ittessä vaikka olisit missä mailmassa.

– Ei sitä tartte hakea kaikkea ulkopuolela Tornionlaaksoa ko sielä oon jo paljon olemassa.

Katto TornedAliens mysikkiviiteota 953 HPDA, sisälepelattu Haaparannassa: 953 HPDA

Meänkielensi Märta, Karin ja Linnea Nylund.

Myysikkeri ja boblaskia! Sebastian Westin-Viippola oon älykäs monela alala. Valokua: Privatti.