Maria Larsson muuttaa 29 vuuen jälkheen Matarinkhiin. Kessään mennessä täyttyy hällä yks unelma – hään aukasee käsityöputiikin keskusthaan.
-Mie oon kasunnu fammun kans, joka osasi unissaki kutoa sukkia, sannoo 49-vuotias Maria.
Maria kuuluu siihheen sukupolhveen, joka muutti 1980-luvun alussa Tornionlaaksosta, aikanna jollonka valtio lykkäsi tänne piitraakia, ette saaha ihmiset hakkeutumhaan pois työttömyyestä. Ekforsin tyär oon sen jälkhiin asunnu Kierunassa kahtheen otheesseen, missä hään oli töissä ensin hoitohommissa ja sitten Valtakunnan Poliisihallinossa. Näitten jälkhiin hään siirty töihin Hallstaviikhiin käsityöahväähriin.
-Mie tehen paljo käsitöitä ja siinä putiikissa hommatessa mie sain aatuksen laittaa pysthöön oman käsityöahväärin. Matarinkissa ei semmosta ole. Monitten mielestä minun aate oon toela hyä.
Putiikin nimi tullee olehmaan käsityönurkka Vaivero (Finnmyrtens handarbetshörna) sentähen ko soon juuri vaivero-kasvi, mikä oon ussein kaverrettu rajala tehthyin aterimhiin ja korhuin. Matarinki tuli osittain senki tähen kysheessen ko hänen kumppani Roger Hjort, jonka juuret oova Armasjärvelä, hakkee työtä.
Marian isä Ingemar Andersson Ekforsista, Hietaniemen ulkopuolelta, oon sitäpaitti antannu ymmärtää, ette hänen huusholli oon hälle liian suuri ja ette hään muuttaa pienemphään asunthoon.
Maria siirtyyki toukokuussa Rogerinsa kanssa hänen omhaan lapsuuskothiin.
Kranhiin kaks kilomeetriä
-Meistä tullee Ekforsin kolmas pysyvä huusholli ja meän lähhiin kranni oon kahen kilomeetrin päässä. Onhaan sielä tillaa, mutta se ei minua häiritte.
Maria toivoo ette saattaa aukasta hänen käsityöputiikin keshään mennessä. Saattaa olla ette kysseesseen tullee Nybergin aiempi lukaali Mataringintielä, mutta tätä kirjottaessa ei mithään ole vielä lyöty lukhoon.
-Tämä käsityöhomma oon mulla geeneissä niin mamman ko papanki puolelta. Fammuki pruukasi istua kungastoolissa ja kutoa siinä nukkuessaki sukkia.
Maria oon itte suuntautunnu virkkaamisheen ja brodeeraukseen, vaikka hään pittää kutomistaki oikein mukavanna.
Hään kattoo, ette hänen kumppani Roger hjelppaa häntä putiikin kanssa.
-Mie saatan piian saaha hänet virkkaahmaa patalappuja, Maria nauraa. Ei ainakhaan, mutta näytheilepanossa hään oon hyä ja saattaa kyllä jelpata.
Mitäs sie ootat enniiten tältä muutolta?
-Ette mie vihonki saan tehhä mitä mie halvaan – olla oman itten trenki.
Meänkielensi Matti Junes
Maria Larsson muuttaa takasi Matarinkhiin ja totteuttaa hänen unelman omasta käsityöahvääristä. Kuva: Privaatti
