Kajsa Vuorela i ett egenkomponerat mönster från Järbo Garn som släpps i december 2020. Foto: Järbo Garn
Kajsa Vuorela omatekosessa myöstärissä Järbo Garn:ista joka julkasthaan joulukuussa 2020. Kuva: Privaatti
Kajsa Vuorela, 33, liikkuu kahen mailman välissä. Osaksi se oon perintheelisen miehekästä niinku prusessinhoitaja LKAB:n malmituotanossa. Osaksi se oon luova myöstärinrakentaja kutomisessa.
Jos Googlaa Tornedalsfrun (Tornionlaaksonvaimo) niin Järbo Garn ilmantuu ja samoten nettisivu Ravelry ja ameriikkalainen langantekijä Purl Soho. Nämät oon joitaki yhteistyökumppania jokka Kajsala oon tänäpäivänä. Kauppa-aate oon alkheelinen: konstryeerata kuottuja myöstäriä jokka henkivä arkipäivää ja elämää pohjasessa(pohjoisessa).
-M’olin 9-10 vuotta ko tehin minun ensimäiset monifärisesti kuotut vanthuut. En mie tieny ette sitä piethiin vaikeanna, mie vain tehin sen.
-Mummu oli tehny parin saamelaisila färilä ja mie halusin tehhä niinku se. Nyt jälkhiin mie saatan yllättyä siittä ette lykästyn.
Kajsa oon aina kutonu mutta instagrammi (@tornedalsfrun) ja sosiaaliset meetiat oon antanu hälle kunnon kyytin ja uusia kontaktia.
Vantus Tornionlaaksonruusu. Kuva: Privaatti
Tyyli?
-Mie halvaisin kuttua sitä pohjaseksi (pohjoiseksi) perintheiseksi kutomiseksi – mutta ei kuitekhaan. Mulla oon vähän tiskreetimpi ja alkheelinen tyyli. Norjalaiset vanthuut, Selbuvotten, oon kauhean koristetut, mie yritän vaimentaa vähäsen ette sopis vaimoile ja miehile, molemile sukupuolile. Ei kaikin tykkää niin monesta myöstäripoortista.
Voimakhaat färit stressaava – Ei sulla ole voimakhaita färiä?
-Mie en tykkää voimakhaista färistä, mie stressainun niistä. Minun kotiissaki oon hillityt färit harmajaskaalassa, luononfärissä ja pruunissa. Jos kuon färilä niin valitten nyansit mikkä sopiva minun tyyhliin.
Kajsa oon tähhään saakka tehny enniiten vanthuita ja sisätohveleita mutta viimiaikona oon lissäintynny koftat ja isomat vaatheet.
-Mie olen hyvin kätevä. Pari myöstäritohveleita ei vie monta tiima, kahessa päivässä mulla oon pari tohveleita mutta silloin kuon vain iltasin.
Oma lempimyöstäri ?
-Se häätyy olla tohveli Elve. Se eustaa minun tyyliä aika hyvin. Elve muuten merkittee ”yhestoista lapsi”.
Elve oon kauhniitten sisätohveleitten nimi, missä oon inspirasuuni pohjosesta perintheisestä kutomisesta. Kuva: Privaatti
Talvi ensimäisenä
Kajsan ensimäiselä myöstärillä, mikä oon jo jonku vuen vanha, oon sitheet luonthoon Tornionlaaksossa.
-Halusin pittää tornionlaaksolaisen tyylin ja mikä oon vasittua elämälle täälä ylhäälä. ”Talvesta” sai tulla vanthuut, se oli minun kaikista ensimäinen myöstäri.
Sitte myöstäri Tornionlaaksonruusu tuli ja sitä seurasi Lempi, sama nimi ko minun mummun sisarela.
Kajsala oon monta myöstäriä mikkä myythään nettisivun Ravelryn kautta. Vantus Talvi oli Kajsan ensimäinen myöstäri. Kuva: Privaatti
Sie olet töissä LKAB:le Vaskivuoressa nyt?
-Mie olen prusessinhoitaja ja tuotan pelletsiä rautamalmista. Olen ollu sielä töissä 15 vuotta.
Kajsan löytää ussein kontrollihuohneesta missä se ohjaa rautamalmipelletsin valmistelua. Joka toinen päivä se oon pelletsilaitoksessa ja tarkastaa konheita ja kruuaa.
-Sielä oon likasta ja kovaäänistä ja miehekästä ja teolista. Kuelma eustaa pehmeätä, vaimopuolista, kotikasta… Tuntuu hyältä ko oon molemat osat elämässä.
Tipsiä toisile jokka halvava alkaa kuthoon?
-Monet uskova ette het etukätheen häätyvä ymmärtää kunka kutoa. Net oon helisemässä ennenko oon yrittäny. Mie tykkään ette työn pittää tehhää vähänkertaa: alkaa panemalla silmät ja sitte jatkaa ensimäiselä varvila, toisela ja niin poispäin.
Kajsa oon yksinhuoltava äiti 8-vuotihaale pojale ja hällä oon kans talo, niin se tuntee ette hään halvaa ottaa siivosti omayrityksen kans.
-Mie freistaan pittää sen hobbyhommana ettei tule liika painetta. Se pittää olla hauskaa, se oon tärkeintä.
Meänkielentäny Märta, Karin ja Linnea Nylund.
Alaviite: Seuraa Kajsan käsityötä @tornedalsfrun (instakrammi).
