Made in Tornedalen oon saanu tie 99:n varrela olevia yrityksiä yhtheisseen homhaan.
– Met halvaamma nostaa Tornionlaaksoa niin aluheena ko tavaramerkkinäki, sannoo puhheenjohtaja Terese Östling.
Viimi vuosina tämä aatus yhtheistyöstä oon pompannu framile yhessä jos toisessaki yhtheyvessä. Varsinki sillon ko eri prujektit oova koohneet yrittäjiä tilapäissiin roikhiin. Näin aina viimi kevhäässeen saakka
– Huhtikuussa met saima aatuksen aukasta yhtheisen popup-putiikin (tilapäisputiikin) Uuista Haaparannan Kaupunkia (Gör om stan) prujektille. Samhoin aikhoin nosti Pelle Pesula framile nimen Made in Tornedalen ja nimi tuntu osuvan aivan naulan kanthaan. Popup-putiikki inspiroi meitä tuohmaan yhtheen eri puolilta Tornionlaaksoa sen designin, käsityöt ja herkut.
Mikäs oon Made in Tornedalen meininki?
– Tehhä yhtheistyötä toimialotten ja kunnitten välilä niin, ette voipii nostaa framile tätä maanäärtä ja tämän kylttyyria. Ko yrittäjät lähtevä yhessä messuile ja markkinoiva yhessä, viehrailia käsittää helposta homman aatuksen, punasen langan.
– Tornionlaakso oon mielenkiintonen sekotus voimakhaita kylttyyrijuuria ja perintheitä, hyvvää ruokaa ja kaunista käsityötä, erikoista luontoa ja väylää, joka sittoo meät kaikin yhtheen. Met olema luovia, rakastamma saunaa ja olemma kuulut viehraanvarasuuesta.
Kekkäs saava olla myötä yhistyksessä?
– Tyrismin, ruuan, käsityön ja designin yritykset oova tervetulheet fölhjyyn 500 kruunun vuosimaksolla. Vastihneeksi net saava potkua markkinointhiin ja maholisuuven olla följyssä yhtheyksissä, joihin heän omat resyrssit olisit riittämättömät, hauskoja kolleekoita ja maholisuuen käyttää heän tuotheen laaun takheena Made in Tornedalen tavaramerkkiä.
Kunka monta jäsentä teilä oon tänä päivänä?
– Juuri nytten oon kymmenen yritystä jäsenlistala. Mitä enempi meitä tullee sitä enempi met saatamma saaha aikhaan. Meät löytää naamakirjan (Facebook), kotisivun ja e-meilin ([email protected]) kautta. Koska met olema niin vasta alkahneet, met keskitymmä nyt siihheen, ette yritys löytää paikkansa ja suunnittelema tulevien vuosien satsauksia. Vuuen 2016 aikana met suunnittelema osalistua ainaski yksile suurile messuile ja järjestää vierailut eri tahoile Tornionlaaksoa.
Kukas sie Terese sitte itte oot?
– Mie oon huonekkalutten verhoilia ja mulla oon ollu oma yritys Udda Med Flit vuuesta 2010. Mie tehen työtä yhessä minun miehen kans Sölkäsaaressa Tornionjoela, kuus kilometria ylös Haaparannalta. Mie oon lisäksi prujektin Gör om stan taitheelinen johtaja. Prujekti freistaa saaha elävämmäksi Haaparannan keskustan. Mie veän kans putiikkia Tornedal & Co Marju Matsin ja Carina Hardellin kans.
– Mie piän, ette kotiseuvun tuotheitten käyttäminen oon tie etheenkäsin. Maapallostuminen (globalisering) tekkee meän tuotheitten alkuperän entistä tärkeämäksi. Se ei meinaa, ette torjua ja sulkea ulos ko ette olla myötä maailmassa ja olla siittä ylpeä.
Alaviitheet: Made in Tornedalen yhistyksen perustaja oon Pelle Pesula (Pesulan maatila). Åsa Pesula oon hallituksessa yhessä Terese Östlingin ja Tarja ja Per-Olov Kinnusen (Taavolan kartano, Mattila), Cristi Sindsenin (graafinen suunittelu) ja Ulric Hietalan (Hietalan Kauppapuutarha, Korva) kanssa.
Meänkielensi Matti Junes
Taavolan kartano Vojakkalasta oon liittyny fölhjyyn yhistyksheen.
