Toornionlaaksolainen Micke Hedalm, 52, oon jo asunu 23 vuotta Thaimaassa semesteriviettopaikan omistajanna sielä meren lähelä.
– Joskus saatan kaivata sitä kovan leivän rajatonta määrää Ruottissa, hään sanoo.
Mikael oon syntyny ja kasunu Mataringissä mutta löysi rakhauen – ja homman – Aasiasta ko hään oli ulkomaanpalveluksessa. Nykyhään hänen elämä täyttyy sillä, ette hään ottaa vasthaan toornionlaaksolaisia ja muita viehraita semestiviettopaikassa Bang Boet Bay Resort, lähelä Siaminlahtea länsirannikolla.
-Mie siiryin tänne minun nykysen vaimon takia. Mie reisasin siiheen aikhaan mahottoman paljon Intiassa ja Intoneesiassa ja lähin sitte aina takasin Koh Samuihiin Thaimaala jossa hään oli.
Mikelä oon koko appipere saaressa ja sen lisäksi valmis semestiviettopaikka afääriliikheenä – siksi siirto oli hälle luonolinen askele.
Mitäs sie tehit Ruottissa ennen siirtoa?
– Mie olin Ruottin Puolustusvoimissa töissä mutta ulkomaanpalveluksessa. Olin ollu pari vuotta Libanonissa ko mulle tarjothiin virka Luulajassa F21:issä mutta olin jo silloin maistelu mailmala oloa ja sanoin ylös sen viran. Sen jälkhiin mie olen ollu töissä Bosniassa ja Kosovossaki lyhempiä aikoja.
– Kaheksan vuotta aikaa met jätimä Koh Samuin ja hoijama nyt yhtä Beach Resort-paikkaa, jossa mie olen joka-homman-nissenä. Met kattoma perhään ette meän viehraat triivastuvva ja päivittäin oon kaikenlaista korjaushommaa huohneissa ja rakenuksissa ulkona ja sisälä. Sitte kaikki ostokset, ravintolassa murkinoitten planeeraus ja paljon muuta mitä kuuluu tykö. En mie senthään työttömännä kuljeskele.
Selitä teän liikheestä
– Bang Boet Bay Beach Resort oon Thaimaan valtareititten ulkopuolela, kaukana niitten joukkotyrismistä. Löyättä meät länsirannkolla Siamlahela, Thaimaan kaitasimassa maapalasessa. Se oon kalastuspaikkakunta, jossa oon pitkät, koskemattomat rannat ja sopevat ihmiset. Justhiinsa nyt meilä oon seittemän nuin 35-kvadraatin huohneita, joissa oon kaikki mukavuuet ja net oon aivan lähelä rantaa.
Tässä lahessa Thaimaan länsirannikolla Micke viettää vuen kaikki vuen päivät. Vaikka kesät hään oon Ylitoornion Ekforsissa.
Onkos teilä viehraita Ruottista?
– Suuriin osa viehraista oon Ruottista ja enniimät oon vielä vakihnaisia viehraita, jokka tuleva takasi vuosittain, usseimiten viis viikkoa kerrala eli vielä pitemphään. Ei niin paljon toornionlaaksolaisia ko mitä mie toivoisin, mutta kuitenki joitaki. Muuten meilä oon semmonen sekakonsepti, viehraita tullee kaikilta puolin Euruuppaa ja joitaki kansa Austraaliasta, USA:sta, Kanadasta ja Eteläaafrikasta.
Käytkö koskhaan kotona Toornionlaaksossa?
– Olen aina käyny kotona kerran vuessa, ko mie tykkään syksyn hirvenjahista. Kolmena viimisennä vuona olen viettäny kesätki Ekforsissa, ko minun äiti ei ennää jaksa hoitaa kaikkia asioita itte. Niin kauon ko hään assuu Ekforsissa niin mie taijan olla sielä nuin 3-4 kuukautta vuessa.
Piättäkös kiini ruottalaisista perintheistä jollaki laila?
– Joulu oon tärkeä, silloin meilä oon aina täynä viehraita ja enniiten ruottalaisia. Met tarjoamma täyen ruottalaisen joulupöyän, jossa oon snapsiaki. Meilä oon kehittynny semmonen tapa kylässä, ko kaikki kokkointuva meilä syöhmään hyvvää ruokaa ja ilta lopetethaan ylheensä karaokela.
– Ko minun upseerikollegat tuleva niin meilä oon hernekeittoa ja pynsjiä ja pääsiäiseksi meilä oon erilaista silliä, munnaa ja Janssonin kiusausta.
Mitäs Toornionlaaksosta oon helpointa jättää pois?
– Kaikki puhheet ilmasta. Ihmiset oon niin kiini siinä säässä, sää vaikuttaa tärkeämältä ko terhveys ja rakhaus. Täälä ei kukhaan välitä. Jos tullee joku saekuuro niin net meinaavat vain ette ”Oh, rainseason, it’s normal”, eli ”Too hot today.”
Mitäs sie kaipaat enniiten täältä kotoa?
– En mithään. Eli joo, piiain mie saatan joskus kaivata sitä kovan leivän mahottomaa määrää.
Meinaattakos tet joskus siirtyä kotia Ruothiin?
– Niin kauon ko minun äiti ellää mie tulen aina, säänölisesti, käyhmään kotona, Ruotti oon fantastinen maa ja mie tulen aina olheen patriuutti ja rojalisti. Ruotti oon minun kotimaa ja lähhiimpännä minun syäntä. Mutta en mie taija koskhaan tulla siirtymhään kotia. Mie toivon ette mie tulen ikkäntymhään täälä yhessä minun lähimitten ja rakhaitten kansa, mie triivastun hyvin vaimon thaimaalaisen suvun kansa ja täälä oon hyvä olla.
Jos halvaa asua teilä, kunkas teät saapii kiini?
– Meilä oon kotisivu, beachthailand.se elikkä sähköposti: [email protected]. Facebookissa meän sivun nimi oon Bang Bay Beach Resort. Ja kesäaikana Ruottissa minun saapii kiini numerossa 073-713 12 02.
Meänkielensi Erling Wande
Mikael Hedalmila ei ole kaipuuta takasi Toornionlaakshoon. Hään oon löytäny unielämänsä Thaimaassa merenrannala yhessä vaimon kansa.
