Kysyimä tunnetuilta toornionlaaksolaisilta kelles het halvaisit antaa joululahjan ja miksikä.
Bengt Pohjanen, kirjaila, Haaparanta/Ylikaihnuu (Överkalix): – Tore Hjortille, STR-T:n puhheenjohtajalle, mie toivotan hyvän joulun. Mie halvaisin antaa hälle kompansin. Soon aina hyvä olla ko johtaa harhassa kulkioita pimeässä ajassa. ”Katto, hänen takana sumu ja hänen eessä vyö.” Ei sole vainkhaan niin pessimististä ko se näyttää tästä Uuvenvuen kantaatin laihnauksesta.
Catharina Isaksson, kirjastonhoitaja, Huddinge/Ylitoornio (Övertorneå): – Mie halvaan antaa minun joululahjan heile, jokka hoitava Ylitoorniola olevaa Luppiovaaraa heän kaikkine hoitoihneen ja ruoan passinkeihneen. Ravintola Utsikt (Näköala) oon saavuttannu suuren suosion ja oon hyvvää reklaamia koko Toornionlaaksole. Mie annan joululahjoina heile enempi toolia.
Lina Stoltz, kirjailia/opettaja, Luulaja: – Mie halvaan antaa kaikile kläpile valkosen – alkoholittoman – joulun.
Tomas Vedestig, kunnanneuvos, Matarinki: – Mie halvaisin antaa siviiliasioitten ministeri Ardalan Shekarabille reisun Ylitoorniolle. Niin ette hään saapii kuula kunka hallitus saattas jelpata Toornionlaaksoa ko siottasit tänne joitaki valtion työpaikkoja. Net olisit yhenlaista laastaria niihiin haahvoin jokka oova jälelä valtion monia vuosia jatkuhneesta meän tallouen kuppaamisesta.
Daniel Särkijärvi, kielitaistelia, Kaihnuu (Kalix): – Mie halvaan toivottaa opetusministeri Gustav Fridolinille joulurauhaa kirjala ja samala vaatia kansallisten vähemistötten äitinkielten opetuksen voimakhaampaa tukemista ko opeetustahan oon nykyhjään monissa kunnissa vain 30-60 minuuttia viikossa. Kirjan nimi oon Mer än ett språk – En antologi om flerspråkigheten i Norra Svärige (Enempi ko kieli – Pohjos-Ruottin monikielisyyen antolookia).
Rut Niska, Säfström, seurakuntakasvattaja, Tukholma/Juoksenki: – Mie halvaan antaa fiinin joululahjan kaikile pakolaisten kanssa työtä tekeville vapaaehtosille.
Tony Kumpula, liikunnan opettaja, Haaparanta: – Mie halvaan antaa Ruottidemokraattien puoluepampuile syämen ko heiltä näyttää sitä uupuvan.
Johanna Nordblad Sirkka, MET Nuoret toiminan vt. puhheenjohtaja, Luulaja: – Mie halvaan antaa minun ”gurule”, Maja Mellale ylimäähräisen semestiviikon ko hään oon ollu niin suurenna tukena mulle minun toimile tilapäisennä puhheenjohtajanna MET Nuorissa.
Maja Mella, toiminanjohtaja STR-T, Pajala: – Mie halvaisin antaa joululahjana TURVALISUUEN kaikile Ruothiin vuuen 2015 aikana yksin tulheile pakolaiskläpeile.
Päivi Barsk, homeopatia yrittäjä, Haaparanta/Ylitoornio/Tukholma: – Mie halvaisin antaa kirjan maltillisen kokkoomuksen Sofia Arkelstenille ko hään oon ehottannu kaikile pakolista rokotusohjelmaa. Kirjan nimi oon A Modell of Health and Disease (Saihrauen ja terhveyen malli). Mie toivon ette hään käsittäs enämpi englanista ko hään käsittää siittä kunka terhveys, rokotukset ja saihrauvet liittyvä toissiinsa.
Gunnel Simu, tilapäinen kunnanneuvos, Haaparanta/Tukholma: – Mie halvaan antaa minun joululahjan Kibenalle Kongon Morogoroon Tansaaniassa. Hään oon myötä samassa ICLD/SIDA:n johtajakoulutuksen ohjelmassa ko mieki. Hänet oon ensimäistä kertaa valittu vaimonna kaupunkinsa pormestariksi. Ruottin avustusrahotten ansiosta hänen johtajuus oon kehittynny. Joululahjaksi mie halvaan antaa hälle voimaa ja rohkeutta täyttää hänen tehtävän parhaala tavala Mogorogon asukhaitten hyäksi.
Tore Hjort, STR-T:n liiton puhheenjohtaja, Haaparanta: – Mie halvaan antaa joululahjan kaikile jokka oova tehheet työtä meän kotimaisten minuriteettien ja niitten oikheuksien hyäksi kielikysymyksissä niinkö mekki olema tehheet tämän meänkielen, meän kylttyyrin ja meän yhtheiskunnalisten tarpheitten hyäksi.
Meänkielensi Matti Junes
