Kierunan-taiteilija sai suurmenestyksen TV-ensikertalaisena

Joakim Karkea Kierunasta/Junosuanosta pääsi jaetulle kakkospaikale SVT:n kilpaprugrammissa Taiteilijaunelma. Kuva: Privaatti

Voi, minkälaista huomiota 33-vuotias Joakim Karkea Kierunasta oon saanut hänen osanotosta SVT:n Taiteilijaunelma-prugrammissa.

– Joka osan jälkhiin mupiili oon tärissy yhtä menoa juuri koko vyön, hään sannoo kaikista pusistiivisestä feedbackistä.

SVT:n satsaus Taiteilijaunelma sihtasi siiheen ette kymmenen lahjakasta taiteilijjaa koko maasta sait kilpaila Ruottin paras-tittelistä.

Osanottajat sait näitten kuuen prugrammin aikana erilaisia tehtäviä ja heän saavutuksia arvosteli yksi tuomarijoukko, jyrry, jossa mm. Ernst Billgren oli matkassa.

Viimisessä osassa, joka lähätethiin ennen joulua, valithiin voittaja: Stina Gunnarsson Göteborista. Mutta 33-vuotias katonpanomies Joakim Karkea, Junosuanosta lähtösin, oli matkassa aina lophuun saakka. 3000 henkeä haki tähhään ottelhuun ja alussa Joakim oli vähän vastahakonen osalistumisheen ko hään ei oikeasthaan tykkää olla ramppivalossa.

Jukke pääsi finaahliin asti yhessä kolmen muun taiteilijan kansa. Tässä hään näkkyy toisena oikealta. Voittaja seisoo kauimpanna oikealla: Stina Gunnarsson. Kuva: Susanne Redebo

Sai uuen sysäyksen

Loppujen lopuksi hään oon kuitenki ilonen siittä, ette hään freistasi.

– Se oon ollu mahottoman mukava. Mie olen oppinu niin paljon, senki ette triivastua kaameran eessä. Mie olen saanu uuen sysäyksen, en ole maalanu näin paljon monheen aikhaan.

Juken taitavasti maalattuja akvarelliä kehuthiin villisti sarjan aikana. Häntä kuttuthaan valon mestariksi siksi ko hään pystyy maalauksessa kuvvaahmaan jopa sen, mistä vuorokauen aijasta oon kysymys. Saattaakos se johtua hänen työkokemuksesta katontekijännä Kierunassa? Töissä hään oon nimittäin nähny monta auringonnousua ja tunnettuja Kieruna-mutiiviä vaihettelivissa valoissa. Tämä pohjosen valoleikki oon innottannu häntä monena vuona ilmasheen sitä omassa ateljeessä Junosuanon paloasemalla.

-Mie halvan saa Toornionlaakson kauhniin maiseman näkyhmään. Justhiins nyt mie tehen paljon revontulenkuvia tähtitaihvaitten kansa ja muuta tämmöstä. Kulluu paljon färiä ja paperia niin ette se tullee aika tyyhriiksi, hehe.

Sen jälkhiin ko hään oon ollu myötä tässä, Jukke oon saanu paljon tarjouksia eri galleriioitten omistajilta tulla näyttämhään hänen tauluja. Siksi hään oon päättäny ette hään tulevanna kevväinä käypii Kaihnuussa, Yli-Kaihnuula ja Luulajassa.

Miltäs tuntu nähhä ittensä TV:ssä?

– Se ouosti kyllä kauheasti kuula oman äänen. Ja mie olin niin hermostunnu ennen joka lähetystä siittä kunka net tulisit leikkaahmaan koko materiaalin. Kyllä mie sitte kuitenki tykkäsin, ette mie pystyin olheen rauhalisenna, vaikka mie kyllä lopulta halusin vain päästä kotia. Mie olin kauheen väsyny kolmen viikon filmauksen jälkhiin jossa saatto olla vaikka 16:n tiiman työurakka päivässä.

Finaaliprugrammissa desemperissä osanottajat maalasit majakkatornin. Juken akvarelli keskimäisenä kuvassa sai fiiniä kritiikkiä jyrryltä. Kuva: Joakim Karkea

Maalasi kaameroitten eessä

Joakim selittää ette suurimphiin haasteishiin kuulu maalaminen yhtaikaaa ko kaksi kaameraa oli käänetty tuukhiin päin. Hään ko ei ollu koskhaan uskaltanut maalata ko joku oli kattomassa.

 Se oli kyllä oikeesthaan semmonen painajaisuni, ko hunteeraa sitä jälkhiinpäin.

Kysymys oon ette saatethaankos taitheessa oikeasthaan kilpaila? Joakim eppäilee mutta sannoo samala ette oikeasthaan kaikki hakemukset sinänsä oon kilpailua, huolimatta siittä onko kysymys stipendistä, koulutuksesta eli näyttelystä jossa halvaa olla osanottajanna.

Joakim oon nyt leetinä hänen katonpanotyöstä lumen ja pakkasen takia, ja tämä antaa hälle enämpi aikaa ateljeessä.

Piiain mie saatan aijan olhoon jättää työn katonpanijanna? Se tekis kyllä hyvvää ette sais maalata joka päivä.

Meänkielensi Erling Wande

Jukke kuvvaa mielelhään mutiivia Kierunasta ja Toornionlaaksosta hänen akvarellissä. Kuva: Privaatti

 

 

 

Haaparannan eliittiurheilijasta akvarellin mestari

Christian Koivumaa oon vaihettannu elämäntietä karatesta akvarellimaalauksheen. Kuva: Privaatti

Haaparannasta syntysin Christian Koivumaa saapii paljon huomiota netissä hänen Haaparantaa kuvavista akvarellistä. 37-vuotias oon karaten monikertanen pohjosmaalainen mestari – mutta hään käyttää nyt kaikki hänen energiian tavottesheen tulla maalaustaitheen mestariksi.

Monet ovat nähneet hänen tunnelmalisia kuvia Naamakirjassa, jossa suuriin osa mutiivistä tulevat Toornionlaaksosta, erityisesti Haaparannan kaupunkista ja talvimaisemista.

– Justhiinsa nämät mutiivit oon hankalia, ja se oli haaste joka houkutteli minua.

Christianni asu Haaparannala 18 vuen ikäseksi asti. Koko nuoruuen aikana karate oli se mikä innosti häntä enniiten ja hään oli myötä landslaakissa 2000-2009.

Hänen meriittilista urheilusta oon pitkä. Itte hään pannee korkeimalle meriittilistale neljä kultaa Pohjosmaitten mestaruuskilapailuista. Kariääri sai kuitenkin äkilisen lopun ko hän sai artroosin ja joutu leikkauksheen.

– Sain kielon kaikista kovasta trääninkistä. Ko mie heitin träänaamasta kymmenen kertaa viikossa joku vuosi aikaa mie häyvyin saa jotaki sen siihaan. Siinä net akvarellit tulit.

­- Oikeasthaan mie näen itteä vastaalkajaksi, vasta nyt, kahtena-kolmena viimisennä vuona oon alkanu tapahatumhaan yhtä ja toista. Akvarellitekniikka oon hankala, olen ollu pahala päälä monta kertaa.

Statt av Christian Koivumaa. Foto Privat

 

Haparanda av Christian Koivumaa. Foto Privat

Mutiivit tulevat ussein Haaparannan kaupunkista. Kaupungin hotell ja vesitorni oon maamerkkiä jokka oon Christiannin kuvile omaisia Kuva: Privaatti.

Mentaaliträäninkistä oon hyötyä

Tässä uuessa harrastuksessa hänelä oon paljon hyötyä iitrotin mentaaliharjottelusta: että sinnikkäästi jatkaa ja jatkaa vaikka vastustaiski niinku färitten kansa, jokka ei aina toimi niinku sitä uskoo.

Taiteessa, sitä vastoinpa hällä oon luonolista kykyä ja nyt hään oon utelias näkheen kunka kauas hään pääsee sillä.

Christianni oon itteoppinut. Hään oon käyny yhen päivän pitusen akvarellikursin Ameriikassa mutta sen jälkhiin hään oon itte kokeilut yhtä ja toista.

Päivisin hään tekkee työtä opettajanna Katrineholmissa, maalaaminen oon vain harrastus, vaikka hään nykyhään myypiiki vähän.

Tuntuukos se erilaiselta kuvata Haaparantaa?

-Joo, mulla oon kauhean monta muistoja sieltä ylhäältä ja se oon mukava kuvaila mutiivia jokka ihmiset tuntevat aivan ittestäänselvinä.

Hään tykkää erityisesti talvesta vuenaikana.

Christianni oon ussein Haaparannala ja pruukaa valokuvata kaupunkiympäristöä. Näitä kuvia hään sitte käyttää tukena muistole.

-Silloin tullee siistiä ja tyylikästä. Mulle tämä oon helpompaa ko ette maalata kesämutiiviä.

Tällä hetkelä karatemestari planeeraa kesänäyttelyä Tornedal & Co:ssa Haaparannan torila.

Alaviite: Saatat nähhä enämpi Christiannin taiteesta atressistä www.christiankoivumaa.com

Meänkielensi Erling Wande