Lapset ja vanhimat kokkoinut alkupäivinä lokakuuta köörileirile Kansan talossa Jukkasjärvessä laulamhaan meänkielelä.
– Meilä oon ollu villin hyvä ja paljon ilosia lapsia jokka oon laulanhee, leikitelhee ja pelahnee. Jokku oon olhee enämpi innostunhee instrymentistä ja toiset laulamisesta, selittää Emma Kiviniemi jolla yhessä mysikkiopettajan Ann- Christin Ojanlatvan kans oon ollu vastuu köörileiristä.
Köörileiri oli yhtheistyö Kierunan kunnan kans. Laulu kaikuu, Sången klingar, oli leirin anonsissa ja se oon kans tekstirivi laulussa minkä osanottajat sait laulaa. Anonsi jatku ”Met laulama ruottiksi ja meänkielelä sisälä ja ympärillä Jukkasfolkkaa! Laulamalla met saama färit, elläimet ja luonon. Met laulama ruasta ja ympäri nuotion, kaikki ette oppia ja huomata kielen.”
– Met lauloma färilauluja; meri oon sininen, puola oon punanen ja niin etheenpäin. Met lauloma vuen aikakausista ja nimilauluja. Oli kans hauska ette kläpit löysit toisensa heti ja leikittelit piilosilla ja mellastit.
Laulut mitä net laulot viikonlopula Ann-Christin Ojanlatva oli kääntäny meänkielele. Oli kans aikaa krillata makkaraa, leikitellä ulkona ja sisälä Kansan talon jymppasalissa. Lauluhetkien välissä puhuthiin meänkieltä ja ruottia
Kaikki sukupolvet olit kuttuttu leirile. Se oli tietysti mamma ja pappa mutta kans ”mummu, fammu, faffa, farpruuri eli musteri”, olit anonsin jälkhiin tervetulheita. Net kakstoista kläppiä jokka olit myötä olit 4:tä -12:ta vuotheen ja tulit Jukkasjärvestä, Kierunasta ja Pajalasta. Net ja niitten vanhimilla oli joku yhtheys kiehleen ja ymmärsit meänkieltä eri määrin.
– Mikä oon ollu hauskhiin oon ette moni oon ollu innostunnu olla myötä ja ette lapset näppäsit kielen niin hopusta.
Emma meinaa ette mysikki oon hyvä malli oppia meänkieltä – erityisesti pienile kläpile jokka ei vielä saata kirjottaa ja lukea.
– Laulut tartut hopusta kläpile. Ko met leikitttelimmä jälkhiin moni kläppi hyrryili lauluja. Ette käyttää liikkumista oon kans pusitiivi, tullee helpompi muistaa.
Niin oli Emmala ittelä ko hään piti oppia meänkieltä. Hään oon mysikkiintonen ja oon käyny mysikkiklassissa, tykkää laulamisesta ja oppii nuottikorvala.
– sillon laulut toimiva hyvin.
Itte hään alko puhuhmaan meänkieltä täytenä ko hään sai lapsia. Niinku moni muu hään kasusi ylös missä hänen ympärillä oli se täytten salanen kieli meänkieli. Hään huomaa ette into ottaa takasi kielen oon lissäintynny.
– Moni tykkää ette net ei ossaa meänkieltä, vaikka net ymmärtävä enämpi ko mitä net sanova ja olisit saattanhee puhua kieltä jos net olisit tohtinhee yrittää, hään meinaa.
Viikonloppu lopetethiin hyvälä konsäärilä koko perheele ja sukulaisile. Emma toivoo ette tullee uusia köörileiriä tulevaisuuessa ja oottaessa laulua meänkielelä, net suunitteleva kielikahvelaa kaikile polvile Jukkasjärvessä kevväilä.
Laulu Lennä
”Laulu kaikuu, Antaa meile voimaa, siivet kantaa yli meän maan”
”Laulu kaikuu Anna meile voimaa, siivet kantaa yli meän maan”
Laulu: Gun Olofsson
Artikkeli: Karin Skoglind
Käänös: Märta, Linnéa ja Karin Nylund
