Opi meänkieltä ”Signen keittokoulussa”


Signe kirnuaa ja opettaa meänkielelä kunka tekkee. Kua: Privatti

Tornionlaaksossa oon vaimo joka tekkee täyelisen sykseen netilä. Signen keittokoulussa Facebookissa met saama seurata Pajalalaista Signeä ko hään petakookisesti keittää sylttiä, aijaa roskia lavamopola, neuloo ja menne Karesuanthoon peukalokyytilä. Kaikki meänkielelä.

 

Inga-Britt Uusitalo entinen meänkielenopettaja Pajalassa oon luonu Signen. Kua: Privatti

Entinen kuva- ja meänkielenopettaja Inga-Britt Uusitalo, 64 vuotta, oon ”Signe” joka oon keksitty karaktääri jolla oon jalat syässä tornionlaakson mullassa.

Signen vaatitus oon vanhaanaikhainen; färikäs krimplenekläninki, tuplat vyölinät, paksut villahousut, klasisilmät missä oon vankat aisat ja lakki mikä muistuttaa sjampinjuunia.

Meänkieli oon tärkeä Signele. Ko se vastaa telefoonissa hään sannoo vain: ”Päivää! Kukas se oon? Tämä oon Signe.” Kua: Privatti

”Signen Keittokoulussa” met saama ottaa ossaa hänen arkielämästä lyhyilä filmipätkilä. Sisältö oon sekotus ruanlaittoa, kylttyyriä, käsityöta, marjankokoamista. Joskus Signe istuu köökissä ja tekkee viinimarjasaftia meänkielelä, toisela kerrala met saama seurata häntä Pajalan markkinoila.

-Signele meänkieli oon tärkeä. Ko hään vastaa telefoonissa hään sannoo vain: ”Päivää! Kukas se oon? Tämä oon Signe.”

Filmipätkät ei ole ammattimaisesti tehty, Inga-Britt tykkää.

-Mie filmaan tavalisella mupiililä ilman statiiviä ja käytän esimerkiksi väskyä ette pysyttää mupilin pystössä. Ja joskus mupili putoaa partheen.

-Moni sannoo ette se oon se joka oon hauskaa Signen kans, ette se oon yksinkertasta eikä niin tällättyä.

Ei, Signe ei ole tällätty se oon niinku se oon. Syvät monolookit tuntheista ei ole hänen mallia.

Inga-Britin veli Hans- Erik Uusitalo pellaa T-Tuureä. Kua: Privatti

Oon ollu monta vuotta

Hään sai oman sivun Facebookissa kevväilä, mutta karaktäärinä hään oon ollu monta vuotta. Inga-Britt oon esittänny häntä Kouluvirastossa Tukholmassa, ja yksityisissä juhlissa ja joskus juhlamarsalkkina/kippismestarinna häissä.

Nimi Signe tullee Inga-Britin vanhamummulta äitin mummulta/ämmiltä.

– Mutta mie en yritä olla niinku joku muu. Signe oon ittensä.

– Se oon kummalista ette ko mie saan hänen kengät jalkhaan niin minusta tullee Signe, mie saan hänen marsimamallin.

Moni oon selittänny Inga-Britile ette net tunteva heän oman äitinäitin ja isänäitin Signessä; lujat, rohkeat ja vahvat tornionlaakson vaimot.

– Tornionlaaksossa oon syvä vaimoinperine ja mie tunnen ison rakhauen näihin vaihmoin. Net oon yrittäväisiä ja mahottoman lahjakkaita. Histuurisesti net osasit niin paljon talonpaikassa, net olit monipuoliset ja pystyvät. Mie toivon ette se näkkyy ette mie tehen karaktäärin rakhauella.

T-Ture oon kans Signen filmatussa mailmassa ja sen rollin pellaa Inga-Britin veli Hans-Erik Uusitalo.

Inga- Britt tykkää ette spontaniteetti oon arvokas ja silti hään välttää maanystä ja uuesti ottamista – kaikki tapahtuu justhiins nyt.

Inspiraatio pätkhiin tullee usseen yhestä sanasta. Justhiins nyt oon ”haijuheinän” vuoro tulla kuvatuksi.

Päivä ko Signe meni peukalokyytilä Karesuanthoon. Selffi matkailijoitten Lena Henrikssonin ja Gerd Henrikssonin kans. Kua: Privatti

Signe Laestadiuspirtilä Karesuanossa. Kua: Privatti

Suomalaiset rakastava Signeä

Suomessa oon aivan hullu veto Signen perhään, suomalaiset rakastava häntä täyelisesti. Monela niistä oon sama histuuria niinku meilä ja net oon siirtyynheet Eteläsuohmeen Tornionlaaksosta. Net tykkäävä ette Signen kieli oon heän.

Kunkas iso tästä karaktääristä saattaa tulla? Tarjouksia ei ole puuttunu, kaikkea raatioohjelmista, cd-levhyin ja kirhjoin saakka. Mutta Inga-Britt oon vielä vähän hissuksi.

-Met saama nähhä mihinkä se lantaa. Jos mie alan järjesthään liika paljon oon vaara ette mie kirjotan maanyksen ja sitten ei mikhään ole hauska. Miehään tehen tämän siksi ette mulla ittelä oon niin hauska.

Hunteerinkiä oon kuitenki ette tehhä oppimateriaalia pätkistä siksi ette net antava hyvvää harjotusta niile jokka halvava oppia ääntämistä.

Inga-Britt oon kans alkanu Facebookiryhmän ”Minun sanat – Mina ord” missä hään tekkee sanalistoja ja sanomia meänkielelä. Net jokka seuraava tätä saava lähättää omia esimerkkiä ja panna kysymyksiä kielestä. Siittä seuraa usseen kiinostavia keskusteluja.

 

Meänkielentänny: Linnea, Karin ja Märta Nylund

Signen keittokoulun löyät ryhmästä Facebookissa – klikkaa linkkiä ja ala jäseneksi: Signen keittokoulu