Nimi: Bengt Niska, STR-T:n puhheenjohtaja 2016 – 2018
Assuu: Pajalassa
Tehtäviä: Pensunääri, jolla oon johtokunnantehtäviä esimerkiksi Rajaväyläkomisuunissa ja Tottuus- ja sovintokomisuunissa.
Kuumiimat kysymykset sinun aikana puhheenjohtajanna?
-Mie olin myötä ajamassa etheen meänkielen hallintaalueet. Stockholmi liitty siihen 2019 vaston mitä kaikki luulit, vaikka se alko sillä ette meät jätethiin syrhjään. Johto oli niin fräkki ette se anto oikeuen saamelaisile mutta ei meile. Se otti tietysti tulta, met järjestimmä kokkouksen Stockholmin kaupunkin polittisen johon kans ja siinä kokkouksessa net annot perhiin. Mie muistan ette met kokosimma voimakhaan porukan siihen kokkuksheen: Rut Niska Säfström, Kristina Hedström, Henning Johansson, valtiopäivämiehet Birger Lahti ja Ida Karkiainen. Se oli valtava voitto ette met saima oikeuen Ruottin issoimassa kunnassa. Ei se menny kauon ennenko Uumajaki anto perhiin.
-Toinen tärkeä kysymys, mitä mie olin myötä vetämässä, oli esitutkimus tottuus- ja sovintokysymyskomisuuni tornionlaaksolaisile, ”Silloin mie olin ko fanki”, minkä Curt Persson teki valtionrahotuksella. Siinä oli paljon töitä saa sen vetosolhmeen, mie ja Maja Mella tehimä lujasti töitä sen kans.
Tottuus- ja sovintokomisuunin esitutkimus annethiin sen aijan kylttyyri- ja temokratiministerille Alice Bah Kuhnkele. Bengt Niska ja Met Nuoretin sen aijan puhheenjohtaja Hanna Aili eustit tornionlaaksolaisia. Kuva: Curt Persson
-2016 kylttyyri ja temokratiministeri Alice Bah Kuhnke vieraili täälä ylhäälä. Se oli täälä meilä kolme päivää. Meilä oli kans konstitysuunsytskotti viehraana monta päivää. Kaks erittäin tärkeätä vierailua missä met siirsimä asioita etheenpäin. Nämät vierailut olit yhtheensä pohja Tottuus- ja sovintokomisuunile.
Vierailu Tornionlaaksossa 2016. Kirjailia Mona Mörtlund, kylttyyri- ja temokratiministeri Alice Bah Kuhnke ja sen aijan förpyntin puhheenjohtaja Bengt Niska. Kuva: Curt Persson
-Minun viimi vuona puhheenjohtajanna meilä oli kaks ministeriä viehraana Tornionlaaksolaisten päivänä Mataringissä, varustusministeri Peter Hultqvist ja maaseutuministeri Sven-Erik Bucht.
-Iso asia minun aikana oli kans laittaa puhheenjohtajakokkouksia, missä kaikki STR-T:n paikalisföreninkitten puhheenjohtajat kokkoinut kerran vuessa keskustelheen yhtheisiä kysymyksiä.
-Mie olisin halunu aijaa vielä muitaki asioita mutta ei tullu niin ko mie jou’uin jäthään tehtävän fepryaarissa 2018 terhveyen takia.
Meänkielensi Märta, Karin ja Linnéa Nylund
